Ciaboga mende bat estropadetan

Ciaboga aldizkariaren ehun urteak ospatzeko, Euskal Itsas museoan argitalpen mitiko honen inguruan erakusketa bat antolatu dugu, Museoko ganbaran egongo da ikusgai abuztuak 30etaik urtarrilak 5a arte. Erakusketa honetan Ciabogaren, irudiak, artikuluak edota ale originalak biltzen dira, Espainian arraun kontuetan espezializatutako lehen aldizkari honen bizitza azaldu ahal izateko.

Azken finean Ciabogak urtez-urte bildutako edukiek gure itsas historia, batez ere euskal arraunketari dagokiona, aztertzeko lehen mailako iturria osatzen dute gaur egun. Lehen aletik hasita, XIX. mende amaieraz geroztik jokatutako Kontxako Estropadetako palmaresa edo euskal estropadetako patroi mitikoak diren Kiriko, Aita Manuel, Matxet edo Manuel Olaizolari eginiko eta balio neurtezina duten elkarrizketak aurki ditzakegu, besteak beste, bere orrialdeetan. Beraz, arraunzale ala ez etorri museoko ganbarara eta gozatu aldizkari honen bizitzan murgiltzen zaituen erakusketaz!